گروُنَه   ايي   رَتنِت    /    سيت   بي قرارِمْ

رَنگِ    پائيز    گِرِتهَ   /   بي   توُ  بهارِمْ

اَسبِكَت   زين   وُ   لَغوُمْ  /  وِ  دَرِ      مالِت

آخمْ   سي   اوُ   كَمَري /  وِ  پَرِ     شالِت

ميشتَلي   طايفهَ   شيخ   /    دوُ ايلِ  سَگوَن

بَميرِمْ    يادگاري   /   وِ   جا    توُ   نَمَن

جات   نَمَن   يادگاري  /   تاريخ       بَموُنهَ

تا    بَلكَمْ   مِرامْ   توُ /    سَر    اوُ  بَموُنهَ

بَنالمْ   سي   مَعرفَت  /   يا   سي     مِرامِت

تَركِ   دُنيا   كِرديهَ  /   ايل   وُ      تِبارِت

يهِ   خوُورَ   بيا   بَگريو    /   بِرارِت  مُردهَ

تَرَتِ  چارلا  بَكوُ   /    بوُن     دِ   گوُردهَ

بِراروُ   سي   رَتنِت /   هِي   غَمْ  دِ    بارَن

عيدي  وُ  محمد رضا / چي توُني    نارَن

كُتلي  سيت    بَوَنمْ   /  كوُل   اَسبِ      كالهَ

سَرِ   خاكِت   بَكارِمْ  /   چَن    گُلِ    لالهَ

سَر   موُوهَ   سيت   بيارِمْ /  شعريا حماسي

پوُرس   وُ  پوُكَت بِيرِمْ / چنوُ كه   هاسي

تفَنگ    دِ    هوُرَ   سَبوُ     /   پيا   د ياري 

بوُنِمِش  وِ   شوُن  مسعود / سي  يادگاري

دَسِمْ  رَت  وِ   سَر   ماشهَ  /  كُشتمْ پيايي

قَصدِ   جوُنمْ   كِردِني  /  سَر يهِ نِزاعي

مُلحَق   بيمْ  وِ   سَگوَنوُ  /  مهِ دوُ جووُني

دوُ   قلاوُند   دِراوُمامْ /  وا دلْ گِروُني

غُلامْ خوُ      قبوُلمْ    داشت/دوُ پيا داري

روُزجَنگ تفَنگ وِ دَس/ بَكنمِش  ياري

رَتيمُو  جَنگ آهوُ   دَشت / مِه وا سوُاروُ

قُلي  وا  حاجي كِلي /   دالوَند   تجاروُ

كَل كُشِ شيشِ مَغار /  شيرن   دِ    بيشهَ

چوُ  هِزارَن  وَن زمي / اوُ سي هَميشهَ

تفَنگتِ  بي شَنگ مَنهَ / اَسب بي سوُارِت

نِدينمْ   چي   اوُ سنوُ /  روُزِ   شكارِت

وِ سيقهَ   چَشيات   بايمْ / هِي    چي چراغهَ

تا اَبد   ايي   دالكَت /    هِي   سي توُ داغهَ

رَتنِت       سوُختهَ     دِلمْ /   بَلكَمْ    بَميرِمْ

دِ كُجان ايي   روُزگار    /   مهِ   دَس   بِيرِمْ

نمي   ري    دُو خاطرِمْ /   مهر بَكنمْ سَردْ

چي كَموُتَر   توُو   مي كمْ / شوُ دِ  وِرِ  دَردْ

هَر   وَقتي وِ  گوُشمْ يا /   نوُمي چي نوُمِت

تا اَبد      قَسَمْ حُرِمْ   /  مهِ   هِي  وِ  جوُنِت

نوُمْ   توُ   وِردِ   زبوُ /    هاي   وِرِ  چَشمْ

هِيسامهَ   وِ   سَرِپا /   مين   دلْ  چي  تَشمْ

نهَ   خُدا   مَرگ وِمْ مي يهَ /  نهَ قوُرِسوُ جا

نهَ     مِرِق  دِ   لار  مَنهَ  /  نهَ  آز    دِ  پايا

دِلمْ   هاس  چي   اوُسنوُ /  دِ  دَر    درايي

حنا    بَكي    دالكهَ    /   جوُنمْ        بهايي

نهَ   دينمْ   نهَ  دِ   مِيا    /    اوُ  روُزگاروُ

مُصطفان     نِشسهَ     بِينمْ /  وِ  تهِ   بِراروُ

چي   درختِ   بي  ثَمَر /   ريزسهَ    بَرگمْ

داغِتهَ  وِ   كوُل   كَشمْ  /  تا  روُزِ     مَرگمْ

مَر فَلك   يادِ   توُنهَ  /   بوُرهَ    دِ    ويرِمْ

سَر   بَنيمْ  وِ   بِيوُونهَ  /  بي   كَسْ   بَميرِمْ

سَفَرِت   دير   وُ   دراز  /  وِر  گَشتي نارهَ 

دالكَت     دَس وِ   زوُني /     چَش  اِنتظارهَ